Պատերազմն ավարտված էր, բայց ոչ դիպուկահարների համար: Ադրբեջանական դիպուկահարները
գյուղից շրջկենտրոն տանող մեքենաների սարսափն էին: Նրանք ամրություններ էին կառուցում
ու խորացնում խրամատները. հիմարություն կլիներ կորցնել նման դիրքերը:
Թուրքերի ամրապնդումը հրամայված էր խանգարել: Դիրքից դիրք 1700 մետր էր: Մթապատվելուն պես վերցրի СВД-ս ու առաջացա մի 500 մետր մնացած թուրքերին:
Իմ մասին: 17 տարեկանում կամավորագրել
եմ ու մասնակցել մի քանի մարտի: Երբ տասնութս լրացել է, զորակոչել են բանակ: Շատերի
պես հայհոյել եմ՝ մթոմ կամավոր կռվել եմ, հիմա
զորակոչում եք: Ծառայությունն այդ տարիներին ուրիշ էր. համարյա կռվում էինք. դիրքեր
էինք առաջ տալիս ու ականապատում, մեկ-մեկ զոհվում, մեկ-մեկ էլ խմբովի պայթում: Դա էր մեզ բախտը:
Կրակայինս միշտ լավ էր, ճակատագրի
բերումով դառձա դիպուկահար: Բանակից դուրս չեկա, պաշտոն-կոչում ստացա ու մնացի: Կցեցին հրահանգիչներից մեկին ու սկսվեցին
դասերս: Երազանքներ ու առանձնակի
նպատակներ չունեի, մնացի բանակում: 17-ում երբ մարդու երազանքներն ու նպատակներն նոր-նոր են կազմավորում, շատերի պես գնացի կռվելու: Հետո տխուր տարիներ էին, էլ ի՜նչ երազեի: Պլանավորել
եմ այս քանի տարում ամուսնանալ, երեխաներ ունենալ, ոչինչ ուրիշ չեմ ուզում:
Ծառայելուց հետո արդեն մի հինգ տարի է ֆռֆռում
եմ դիրքերով: СВД-ս միշտ հետս է լինում ու երբեմն թվում է, թե այս անշունչ առարկան
ընկերս է:
Մթության մեջ թփուտներում փռեցի թիկնոցս ու պարկեցի: Ուրիշ բան չեր մնում, քան լույսը բացվելուն սպասել: Ազերիների ձայներն արդեն լսելի էին: Միակ ցանկությունս էր, որ չնկատեին թափառող շները: Սրանք դիրքերում կամ փրկում են կամ մատնում ամենասարսափելի ձևով: Հա, մոռացել էի ասել, որ ռացիայիս մյուս ծայրին գնդացրորդն էր: Պլանի համաձայն՝ պիտի խլացներ կրակոցներս: Ահա մի քիչ շուռումուռ եմ գալիս, փորձում եմ քնել: Քիչ տանջվում
եմ ու մի քիչ աչք փակում:
Դիպուկ կրակելը քիչ է դիպուկահարի համար, լավ դիպուկահարը որսորդ պիտի լինի: Իսկ լավ որսորդը երկաթյա կամք ու համբերություն պիտի ունենա: Դե չխորանամ, թե ինչպես եմ նախօրոք քողարկվում ու քողարկում СВД-ս: Ի՞նչ առաջադրանք ունեի:Առաջադրանքս է մեկին գյուլել ու հետ գնալ:
Ադրբեջանցիները շատ են հաբրգել, պետք էր դոզա տալ:
Լույսը բացվեց ու անցան գործի: Օպտիկան աչքս արա ու սկսեցի աշխատել:
-Կոմբայնդ միացրու,- շշնջացի ռացիայի մեջ:
Կարճ կրակոցների ներքո օդ հավաքեցի ու սկսեցի կամաց-կամաց բաց թողնել, ցուցամատիս ծերը, ասես, քերելով՝ չխկացրեցի: Թվաց, թե հրաձգարանում եմ ու հրահանգիչս ցնծագին ժպտում է: Սպան գլորվելով՝ մի տասը մետր ցած սահեց: Քֆուր-քյաֆար բարձրացվեց, թուրքերի գլխով չանցավ էլ փնտրել ինձ: Պլանն աշխատեց. գիտեին, թե գնդացրորդն էր: Երկար ժամնանակ ռիսկ չեին անում մոտենալ սպային: Բայց երբ ռիսկ արան, ծակեցի նրանցից մեկի ազդրը: Աշխատանքը համարյա ավարտված էր, մնում էր նորից մութն ընկնելուն սպասել:
Հանկարծ տեղի ունեցավ այն, ինչը մինչ օրս մոռանալ չեմ կարող: Մի քանի րոպե տևած լացուկոծից ու աղաղակից հետո, բլուրից ցատկեց ու սպային վրա ընկավ մի 12-ամյա մանչուկ: Սկսեց սուգ անել մեծ կնկա պես: Որ աշխարհն է անիծում, կռահեցի:
Ուշ իմացա, որ սպան սահմանամերձ գյուղից է, որդին իմացել էր ու եկել... Թմրեցի, բայց երբ զգաստացա՝ թվաց աշխարհի ամենավերջին ստոր արարածն եմ: Ես չկայի, ինձնից նողկանքի հոտ էր գալիս: Սենց բան կատարված չկար: Ոչ լացելս էր գալիս, ոչ էլ... ոչինչս էլ չեր գալիս... Երբեք իմ արածի արդյունքը տեսած չկայի: «Հետո՜ ինչ, թշնամուս եմ գյուլել»,-պայքարում էի հանգստացնել ինքս ինձ … Այո, ցավն ու
ողբերգությունն ազգություն չունեն:
*******
Հասկացնել տվինք, որ չենք կրակելու, թուրքերը իջան դին հանելու:
*******
Երկար ժամանակ այդ տեսարանը գլխիցս չեր հեռանում: Դառել էր իմ կյանքի պատիժը: Ոնց որ գլխավոր հերոսն լինեի «Ոճիռ ու պատիժ» վեպից: Երկար ժամանակ СВД-ն ձեռս առնելու հավես չկար: Արձակուրդ վերցրի, չօգնեց: «Եթե դու՛ լինեիր ու մարմնիդ վրա որդիդ լացեր»,- միտքը, հոգիս էր սղոցում:
******* *******
Պատերազմում հաճախ է ամեն ինչ փոխվում 180 աստիճանով:
Հարևան դիրքի հերթապահի դեբիլության պատճառով Վովան դառել էր դիպուկահարի զոհը: 19-ամյա Վովային բոլորն էին սիրում: Ամեն մեկի շրջապատում
մեկը լինում է, ում սիրում են բոլորը… անշահասեր...
Նրանք կիրովաբադցի էին, որդու բացի
մայրն ոչ ոք չուներ:
Ինձ ու մի քանի զինվորի էր վստահված Վովային տեղափոխելը, վերջում պիտի պատվո պահակախումբ կազմակերպեինք: Ծանր էր: Հողին հանձնելիս կնոջ նման դողալով էի լացում, ու ոչ միայն ես:
*******
Վճիռը անբեկանելի էր՝
վրեժ լուծել:
*******
Կասկած չկար, որ Վովային սպանողը
նոր դիպուկահար էր: Սրիկան վիրավորել էր երկու զինվորի: Հարցոփորձ արինք, պարզվեց՝
տղերքը գնդակի սուլոցը
լսեցին միանգամից՝ Վովային կպնելուն պես: Գնդակի արագությունը մի քանի անգամ ուժեղ է ձենից: Նշանակում էր, որ
սրիկան մոտակայքում էր
թաքնվում, մոտ՝ 200-300 մետրի վրա: Սողոսկում
էր առաջ ու թաքնվում մոտակա անտառագծում: Սկսվեց մեր որսը: Փետով ու կասկայով խայծը սրիկան չեր ուզում ուտել: Դիրքով մեկ՝
կասկայով ֆռֆռում էինք… բայց
ապարդյուն: Ամեն ինչ անում էինք, որ կասկայի շարժումները առավելագույնս բնական լինի,ասես՝ իրոք զինվոր էր
շարժվում: Մեկը ֆռֆռում էր, մյուսը դիտողություններ անում՝ քամակդ լավ շարժիր: Ինչ արած, սողունը չեր բռնվում, ու վերջ:
Դիպուկահարի համար դիրքեր ուղարկեցին
Դևին: Դևը հետախույզ էր, նրանցից, ում մասին քաղքի մարդիկ սիրում են լեգենդներ պատմել:
Ասեմ, որ Դևը մի հատ չէ, դևեր շատ կան, համարյա
ամեն զորամասում:
Դևը վաշտի հրամանատար էր, մինչև ողնուծուծը հետախույզ: Դևը եթե դև չլիներ, հաստատ հիմա գնդի հրամանատար
կլիներ: Դևը իրոք հրեշտակ չէր, մի գաղտնիք բացեմ. իսկական հերոսները պուպուշ տղաներ
չեն, ինչպես գրվում է կարմիր գրքերում: Կռվի ժամանակ մոտոհրաձգային վաշտ է ոչնչացրել
ու վեց ՀՄՄ վերցրել:Ամեն ինչ հրաշալի էր ընթանում,
նույնիսկ կոմբատի պաշտոն տվին: Ինչ է լինում, ինչ է ստացվում, Դևը թարսվում է վերևների հետ: Ու ի՞նչ է անում: Վեցից երեք ՀՄՄ-ն բաց թողնելով ականապատված դաշտով՝ վարի տալիս: Պատիժը սարսափելի պիտի լիներ, բայց հաշվի առնելով ծառայությունները, իջեցնում են մինչև վաշտի հրամանատար:
Ինչպես փոքրիկ երեխաներն են հոր մոտ
ապահով զգում, այնպես էլ մենք Դևի մոտ: Ինչպես հայրն է որդու համար հեղինակություն,
այնպես էլ Դևը մեզ համար:
Թուրք դիպուկահարը սուր հոտարությամբ զգուշավոր գազան էր, դարանակալությունն էլ անհաջողությամբ պսակվեց:
Մի քանի օր առաջ այս վայրերում սակրավորներն էին աշխատում ու չհասցրին ОЗМ-72-ները հետները տանել: Ի՞նչ է ОЗМ-72 –ը:
Դա մի հակահետևակային նենգանք է, գետնից ցատկում է ու հավասարվելով մարդու կես հասակին՝ 30 մետր շառավիղով վարի է տալիս: ОЗМ-72-ից փրկվել չկա: Անթիվ-անհամար բեկորներ է պարունակում հակագազի բալոն հիշեցնող ականը, որոնք մարմինը ֆարշ են դարձնում: Դևն հետախույզ ընկերոջ հետ շռայլորեն օզէյեմապատեց
կածաններն` դիպուակահարի հնարավոր երթուղիները:
Շունչներս պահած սպասում էինք զոհին, ինչպես զահլա տարած մկան թակարդ ընկնելուն են
սպասում: Ազարտի գործակիցն էլ կար այս ամենում:
Որպեսզի այդ սողունը, մարդ ես, չսողոսկեր, Դևը հրահանգեց պայթյունի ուղղությամբ կարկտակոծել ДШК-ով:
Օնցան օրեր… պայթյուն չկար… Արդեն
կասկածում էինք, որ դիպուկահարը ճողոպրել է այս վայրերից` զգալով տոտալ որսը:
ДШК-ի մոտ թթվելու իմ հերթն էր, երբ
լուսադեմին 400 մետրի վրա գմփոց բարձրացավ: Այդ ուղղությամբ մի թեթև բովեցի:
Գիշերը Դևն նույն ընկերոջ հետ «զբոսա
նքի»
իջավ: Քիչ անց մեր առջև ընկած
էր սվաղված մարմնով 35-ամյա ազերին ու ծռված СВД-ն:
СВД-ի կոթը դզվեց ու մնաց վաշտին…
2002 թվական, մի դիպուկահարի օրագրից
Комментариев нет:
Отправить комментарий